ကရင်နီပြည်တွင် စ.က.စတပ်မှ လူထုအားဖမ်းဆီး၍ အထမ်းသမားအဖြစ်အသုံးပြု၊ အချို့အသတ်ခံနေရ

ကရင်နီပြည် ထိုးစစ်အတွင်း စ.က.စတပ်မှ ပြည်သူများကိုဖမ်းဆီးကာ ရိက္ခာနှင့် ကျည်ဆံများသယ်ခိုင်းလျက်ရှိနေပြီး အချို့ပေါ်တာအထမ်းသမားများ အသတ်ခံနေရကြောင်း မြေပြင်တွင် အထူးသတင်းများစုံစမ်းစစ်ဆေးနေသည့် KnIC အဖွဲ့ဝင်တစ်ဦးမှ အောက်တိုဘာလ ၂၆ရက်နေ့သတင်းပေးပို့ချက်အရသိရသည်။

ခု နောက်ပိုင်းမှာ စစ်ကောင်စီတပ်တွေဟာ စစ်ကြောင်းတွေ ထိုးတဲ့အခါ စားနပ်ရိက္ခာ ကို ကိုယ်တိုင်သယ်သွား တာမျိုးတွေ မလုပ်တော့ပဲ လက်နက်ခဲယမ်း ၊ ကျည်ဆံတွေကိုသာ အဓိကထား သယ်သွားပြီး သူတို့ ရောက်တဲ့ ရွာတိုင်းကို ဝင်ရောက်တပ်စွဲ ပြီး ရိက္ခာတွေ ကိုဖောက်ထွင်း ခိုးယူ ပါတယ်။ ချက်ပြုတ်စားသောက်ပြီး လမ်းမှာ ဖမ်းချင်တဲ့ သူကိုဖမ်းပြီး ရိက္ခာ အချို့ သယ်ခိုင်းတာတွေ ၊ ကျည်ဆံ ခဲယမ်း သယ်ခိုင်းတာတွေ ပြုလုပ်ခိုင်းပြီး ပြန်လွှတ်လာတဲ့ ဒေသခံတွေရှိသလို အသတ်ခံလိုက်ရတဲ့ ဒေသခံတွေလည်းရှိနေပါတယ်။ဟု ၎င်းကပြောသည်။

လက်ရှိထိုးစစ်ဆင်ခြင်းခံနေရသော ဖယ်ခုံ၊ မိုးဗြဲ၊ ဒီးမော့ဆိုနှင့် ဖရူဆိုဒေသရှိ လူနေအိမ်တိုင်းသည် စ.က.စတပ်မှ ဖောက်ထွင်းဖျက်ဆီးခိုးယူနေမှုများရှိနေပြီး လူနေအိမ်အနီးအနားတဝိုက် မြေမြှုပ်မိုင်းများထောင်ထားလျက်ရှိသည်ဟုဆိုသည်။

ပြည်သူအားပေါ်တာအဖြစ်ဖမ်းဆီးခြင်း၊ သတ်ဖြတ်ခြင်း၊ ပြည်သူနေအိမ်များဖောက်ထွင်းဖျက်ဆီးခြင်း၊ ပစ္စည်းနှင့်ရိက္ခာများခိုးယူနေခြင်းအားလုပ်ဆောင်နေသော တပ်မ (၆၆)သည် ဖယ်ခုံ၊ မိုးဗြဲ၊ လွိုင်ကော်၊ ဒီးမော့ဆို၊ ဖရူဆိုမှ ဘောလခဲတလျောက် တပ်အင်အားများချထားပြီး ထိုးစစ်ဆင်လျက်ရှိနေသည်ဟု ကရင်နီတပ်မတော် စစ်ရေးချုပ်ရုံးမှ စုံစမ်းသိရှိရသည်။

အသတ်ခံရသော ပေါ်တာအထမ်းသမားများအား KnIC အထူးသတင်းစုံစမ်းရေးအဖွဲ့မှ ဆက်လက်စုံစမ်းလျက်ရှိနေပါသည်။

KnIC